नागपूर शहरात तयार करणार नव्या ७५ हेल्थ पोस्ट

नागपूर : १७ जानेवारी - नवनिर्वारित महापौर दयाशंकर तिवारी यांच्याकडे सव्वा वर्षाचा कार्यकाळ आहे. त्यांच्या अजेंडावर असलेल्या महत्वाकांक्षी योजनांपैकी एक असलेल्या योजनेनुसार ७५ नव्या हेल्थ पोस्ट तयार करण्यात येणार आहे. राष्ट्रीय नागरी आरोग्य अभियानाअंतर्गत हा प्रकल्प राबवण्यात येणार आहे. यासंबंधीचे प्रस्ताव तीन दिवसात तयार करण्याचे आदेश तिवारी यांनी आरोग्य विभागाला दिले. शहरात ज्या भागात लोकसंख्येनुसार आरोग्य यंत्रणा अपुरी आहे किंवा मुळीच नाही अशा भागांचे सर्वेक्षण करून हेल्थ पोस्टसाठी तत्काळ जागा निवडण्याच्या सूचनाही करण्यात आली.

महापौर पदाची सूत्रे स्वीकारल्यानंतर तिवारींनी शहराच्या बाह्य भागांत ७५ हेल्थ पोस्ट तयार करण्याची घोषणा केली होती. आता या कार्याला गती मिळाली आहे. महापौरांनी याबाबत संबंधित अधिकाऱ्यांशी चर्चा केली. शहराच्या बाह्य भागातील सर्व नगरसेवकांचे जागेसंदर्भात मत जाणून घेण्यासाठी आणि यावर चर्चा करण्यासाठी सोमवार १८ जानेवारीला बैठक घेणार असल्याचेही त्यांनी यावेळी सांगितले. हेल्थ पोस्टच्या निर्मितीमुळे सर्वसामान्य लोकांच्या आरोग्याशी संबंधित गरजा पूर्ण करण्यासाठी व उपचारासाठी लागणारा खर्च कमी होण्यास मदत होईल. वेगाने वाढणाऱ्या शहरी लोकसंख्येच्या आरोग्याविषयक आव्हानांना सामोर जाण्यासाठी या हेल्थ पोस्टची मोठी मदत होणार आहे. जुन्या रचनेतील वॉर्डाच्या धर्तीवर ही यंत्रणा उभारण्याची सूचनाही बैठकीत महापौरांनी केली.

शहरात रुग्णवाहिका जननी सुरक्षा सेवा सर्व तळागाळातील नागरिकांना मिळावी यासाठी लहान मारुती व्हॅनचा उपयोग करण्याची सूचना बैठकीत अधिकाऱ्यांना करण्यात आली. या व्हॅनमुळे वस्तीत राहणाऱ्या नागरिकांनाही फायदा होईल. रुग्णवाहिका थेट वस्तीत रुग्णाच्या दारासमोर नेऊन रुग्णाला तत्काळ रुग्णालयात पोहचविण्यास मदत होणार आहे. त्यामुळे या प्रकल्पाला गती द्यावी असे आदेश महापौरांनी दिले. बैठकीला उपमहापौर मनीषा धावडे, स्थायी समिती सभापती विजय (पिंटू) झलके, आरोग्य सभापती वीरेंद्र कुकरेजा, ज्येष्ठ नगरसेवक सुनील अग्रवाल, अतिरिक्त आयुक्त राम जोशी, उपायुक्त (महसूल) मिलिंद मेश्राम, वैद्यकीय आरोग्य अधिकारी डॉ. नरेंद्र बहिरवार, डॉ. संजय चिलकर, वैद्यकीय अधिकारी डॉ. विजय जोशी, टाटा ट्रस्टचे प्रकल्प व्यवस्थापक डॉ. टिकेश बिसेन, डॉ. विंकी रुगवानी, डॉ. चरडे आदी उपस्थित होते.