कर्ज काढून देतो म्हणून वृद्धाची केली ६ लाखांनी फसवणूक

November 29,2020

अमरावती : २९ नोव्हेंबर - कर्ज  काढून देतो म्हणून दलाला मार्फत एका वृद्धाचे बँक खात्याचे चेकबुक व एटीएमम स्वतः जवळ ठेवून संगनमताने  त्यांच्या खात्यातून 6 लाख 85 हजार 999 रुपये परस्पर काढून फसवणूक केल्याची धक्कादायक घटना अमरावती शहरातील इरविन चौकातील इंडसइंड  बॅंकेत घडली आहे.

खरैया नगर इथं राहणाऱ्या हरिश्चंद्र वानखडे या 74 वर्षीय वृद्धाने कर्ज काढण्यासाठी इंड्सइंड बँकेत चौकशी केली होती. त्यानंतर आरोपींनी  वानखडे यांना घराचे सगळे कागदपत्रे घेऊन बोलावले होते. त्यांच्या घराच्या कागदपत्रांवर 6 लाख 85 हजार रक्कमेची लोन केस बँकेचा एजंट प्रवीण उके याने मंजूर केले होते.

पण, 6 लाख 85 हजारांची रक्कम उके याने हरिश्चंद्र वानखडे यांना दिलीच नाही.  हे सगळे पैसे प्रवीण उके बँकेतील लिपिक निकिता साबळे व बँक व्यवस्थापक पटेल या तिघांनी संगनमताने हडप केली.

वानखडे यांनी लोनची रक्कम वेळोवेळी उके याच्याकडे मागितली. पण, उडवाउडवीची उत्तर देऊन त्याने रक्कम देण्यास टाळाटाळ केली. वानखडे यांनी  आपली फसवणूक झाल्याचे लक्षात आले.

वानखडे यांची फसवणूक झाल्याची माहिती  सामाजिक कार्यकर्ते अमोल इंगळे, मनोज व त्यांच्या कार्यकर्त्यांनी समजली. त्यामुळे त्यांनी पोलीस ठाणे गाठून तक्रार दाखल केली.

या प्रकरणी सिटी कोतवाली पोलिसांनी आरोपी बँक व्यवस्थापक, बँक लिपिक निकिता साबळे आणि एजंट प्रविण उके या  तिघांविरुद्ध फसवणुकीचा गुन्हा दाखल केला आहे. गुन्हा दाखल झाल्यानंतर उकेसह सर्व आरोपी फरार झाले आहे. पोलिसांनी आरोपींना अटक करण्यासाठी पथक पाठवले आहे.