भर पावसात दुचाकीवरच झाली महिलेची प्रसूती

यवतमाळ : २४ सप्टेंबर - यवतमाळ शहरातील भोसा  नाका  परिसरात दुपारी मृत अवस्थेतील अर्भक सापडले. या घटनेचा पोलिसांनी शोध घेतला असता भयानक वास्तव पुढे आले. मुरझडी येथील २० वर्षीय गर्भवती सोनोग्राफीसाठी यवतमाळला आली. तपासणीनंतर गर्भ मृत असल्याचे समजले. खासगी रुग्णालयात जात असतानाच दुचाकीवर प्रसवकळा सुरु झाल्या. त्यातच दुपारी धुवाधार पाऊस पडत होता. यात तो मृत गर्भ कधी बाहेर पडला हे समजलेच नाही अन रस्त्यावरच प्रसूती झाली. 

आठ महिने पूर्ण झाल्याने मुरझडी येथून सकाळी सुनेला घेऊन सासरे दुचाकीवर यवतमाळला आले. दत्त चौकातील सोनोग्राफी सेंटरमध्ये तपासणी केली. त्यात डॉक्टरने गर्भ मृत असल्याचे सांगून गर्भवतीला तातडीने रुग्णालयात दाखल करण्याचा सल्ला दिला. ते एकूण दोघेही सुन्न झाले. भोसा  मार्गावरील स्त्री रोग तज्ज्ञांकडे तपासणीला जाण्यासाठी म्हणून दत्त चौकातून निघाले. 

तितक्यात दुपारी जोरदार पाऊस सुरु झाला. कसेबसे भोसा नाका परिसरात पोहोचत नाही तोच त्या महिलेची दुचाकीवरच प्रसूती झाली. अवघडलेल्या अवस्थेत तिला असह्य कळा सुरु झाल्या. सोबत असलेल्या सासर्यांना सांगण्याच्या आताच गर्भ बाहेर पडला. वरून जोरदार पाऊस असल्याने रस्त्यावरही कुणीच नव्हते. स्त्री रुग्णालयापासून काही मीटर अंतरावरच हे अघटित घडले. त्यानंतर महिला बेशुद्ध झाली. सासर्याने कसेबसे दुचाकीवरून आपले गाव गाठले. 

पाऊस थांबताच मृतावस्थेतील अर्भक मुख्य रस्त्यावर पडलेले पाहून खळबळ उडाली. अवधूतवाडी पोलिस ठाण्यातील  शोध  पथकाच्या कर्मचाऱ्यांनी अवघ्या काही तासातच घटनेचा छडा लावला. आणि अर्भक कुटुंबियांच्या स्वाधीन केले. मुरझोडीत कुटुंबीयांनी त्याच्यावर अंत्यसंस्कार केले.