जेष्ठ साम्यवादी नेत्या रोझा देशपांडे यांचे निधन

September 20,2020

मुंबई : २० सप्टेंबर - ज्येष्ठ साम्यवादी नेत्या व माजी खासदार कॉम्रेड रोझा देशपांडे यांचे शनिवारी प्रदीर्घ आजाराने निधन झाले. त्या ९२ वर्षांच्या होत्या. त्यांच्या पश्चात विवाहीत कन्या, मुलगा, नातवंडे असा परिवार आहे. रोझा या कॉम्रेड श्रीपाद अमृत डांगे यांच्या कन्या होत्या. रोझा देशपांडे या वृद्धापकाळामुळे गेल्या काही महिन्यांपासून आजारी होत्या. एप्रिल महिन्यात त्यांच्या शरीरातील सोडियमचे प्रमाण कमी झाले होते. शिवाय त्यांच्या फुफ्फुसात संसर्ग झाल्याने त्यांना दादरच्या सुर्शृषा रुग्णालयात दाखल करण्यात आले होते. काही दिवस उपचार घेतल्यानंतर त्यांना डिस्चार्जही देण्यात आला होता.

शनिवारी त्यांची प्रकृती खालावल्याने दुपारी १२.३0च्या सुमारास राहत्या घरी त्यांनी अखेरचा श्वास घेतला. रोझा देशपांडे यांच्या निधनाने साम्यवादी चळवळीचा साक्षीदार हरपल्याची भावना व्यक्त होत आहे. त्या क म्युनिस्ट पार्टी ऑफ इंडिया (सीपीआय)च्या तिकिटावर उत्तर मध्य मुंबईतून लोकसभा निवडणूक जिंकल्या होत्या. त्या सिद्धहस्त लेखिकाही होत्या.